ДУШАНБЕ, 15 июл — Sputnik. Вазорати дифои Русия гуфт, дар самти Донетск талафоти низомиёни украинӣ дар як рӯз 315 нафарро ташкил додааст.
Ин ниҳод қайд кард, ки дар давоми рӯз нерӯҳои мусаллаҳи Украина кӯшиши ҳамла ба самтҳои Донетск, Краснолиманск ва Южнодонетск карданд.
Аз ҷумла, вазорат тавзеҳ додааст, ки дар самти Донетск дар натиҷаи амалиёти муташаккили воҳидҳои гурӯҳи нерӯҳои "Ҷанубӣ" 17 ҳамлаи душман дар мавзеъҳои аҳолинишини Северное, Курдюмовка, Новомихайловка, Маринка, Клешеевка, Малоилииновкаи Ҷумҳурии мардумии Донетск ва Белогоровкаи Ҷумҳурии мардумии Луганск бомуваффақият рафъ карда шуд.
Илова бар ин, дар мавзеи Курдюмовка фаъолияти тахрибкоронаи нерӯҳои украинӣ боздошта шуд.
"Дар ҷараёни амалиёти ҷангӣ талафоти душман 315 низомии украинӣ, ду мошини зиреҳпӯши ҷангӣ, се мошини боркаш ва ҳамчунин як гаубитсаи D-30-ро ташкил додааст", - гуфт вазорати дифоъ.
Ёдовар мешавем, ки Русия рӯзи 24 феврал дар Украина амалиёти вижаро оғоз кард. Раисиҷумҳури Русия Владимир Путин ҳадафи онро "ҳимояи одамоне номид, ки тӯли 8 сол аз сӯи режими Киев мавриди таҳқиру наслкушӣ қарор гирифтаанд".
Барои ин, ба гуфтаи ӯ, дар назар аст, ки "ғайринизомисозӣ ва нозизудоии Украина" ва ба ҷавобгарӣ кашидани тамоми ҷинояткорони ҷангии масъули "ҷиноятҳои хунини зидди мардуми осоишта" дар Донбасс сурат бигирад.