ДУШАНБЕ, 5 июл — Sputnik. Наздикони Рустам Ашӯров, шаҳрванди 43-солаи Тоҷикистон хостаанд, ҷасадаш ба Ватан интиқол дода шавад.
Дар ин бора NewsMaker бо такя ба сафорати Тоҷикистон дар Украина хабар дода, афзудааст, ки хешовандони ин мард қасд доранд ҷасади ӯро ба Ватан баранд.
Қаблан додситонии Молдова гуфт, то ҳол расман ҳеч дархосте барои интиқоли ҷасади Ашӯров ворид нашудааст ва агар чунин пайдо нашавад, эҳтимол ӯ дар Молдова ба хок супорида шавад.
Рустам Ашӯров, ки 30 июн дар фурудгоҳи пойтахти Молдова 2 маъмури амниятиро паронд, зимни амалиёти ҷавобӣ таслим нашуду маҷруҳ гардид. Вай баъди чанд рӯзи беҳушӣ дар бемористон фавтид.
Мақомоти Молдова мегӯянд, ҳодисаи тирпарронӣ замоне рух дод, ки ин шаҳрванди Тоҷикистон, ки бо ҳавопаймо аз Истанбул ворид шуд, ба кишвар роҳ надоданд.
Дар ҷараёни бозгашт Рустам Ашӯров таппончаи як афсари пулисро гирифта, ба тирандозӣ гузашт, ки дар пайи он як марзбон ва як афсари амнияти фурудгоҳро кушта шуд.
Гуфта мешавад, ки Ашӯров қаблан дар сохторҳои Вазорати корҳои дохилии Тоҷикистон 7 сол хизмат мекард, аммо барои рафтори ношоиста аз мақом барканор шудааст. Ҳамчунин вай барои роҳзанӣ маҳкум шудааст.
Додситонии кулли Тоҷикистон эълом кард, ки ин нафар узви гурӯҳи созмонёфтаи ҷиноӣ аст, ки дар рабудани муовини раиси "Ориёнбонк" Шӯҳрат Исматуллоев даст дорад ва таҳти пайгард қарор дошт.