ДУШАНБЕ, 17 июн — Sputnik. Дар роҳи мошингарди Душанбе-Хоруғ дар ҳудуди ноҳияи Рӯшон садамаи маргбори нақлиёти рух дод.
Дар ин бора дафтари матбуоти Кумитаи ҳолатҳои фавқулода хабар дода, афзуд, ки мошин ба дарёи Панҷ сарозер шудааст.
Гуфта мешавад, ки ҳангоми садама дар дохили мошин 2 нафар: ронандаи 43-сола ва мусофири 39-сола, ҳарду сокинони Вилояти Мухтори Кӯҳистони Бадахшон буданд.
Як манбаъ ба Sputnik Тоҷикистон хабар дод, ки дар мошин додару хоҳар, сокинони ноҳияи Шуғнон қарор доштанд ва пас аз сарозер шудани мошин ба дарё мард тавонист наҷот ёбад, вале хоҳараш натавонист аз об берун ояд.
Мусофирзан дар Русия чанд сол боз дар муҳоҷират буд ва тоза ба ватан баргаштаст.
КҲФ мегӯяд, мошинро тавассувти кран аз дарё берун оварданд, вале мусофирзан дар дохил набуд.
Ҳоло ҷустуҷӯи ҷасади зан идома дорад, мегӯяд КҲФ.
Дар ҳамин ҳол, Кумитаи ҳолатҳои фавқулода аз ронандагонро даъват мекунад, ки: қоидаҳои ҳаракатро риоя кунанд.
Қаблан кормандони КҲФ ба аҳолии Тоҷикистон ҳушдор дода буданд, ки дар давраи аз 16 то 20 июн сатҳи об дар шохобҳои ҳавзаи рӯдхонаҳои Панҷ, Вахш ва Зарафшон боло меравад.
Инчунин, дар ноҳияҳои кӯҳии тобеи ҷумҳурӣ, Суғд ва ғарби Вилояти Мухтори Кӯҳистони Бадахшон хатари омадани сел мавҷуд аст.