ДУШАНБЕ, 13 июн — Sputnik. Мақомоти вилояти Суғд иттилоъ додааст, ки барои зиёд намудани ҳаҷми истеҳсолот ва истифодаи самаранок аз иқтидорҳои истеҳсолӣ нақшаҳо тарҳрезӣ шудааст.
Иттилоъ дода шудааст, ки корхонаи муштараки "Апрелевка" дуюмин корхонаи калонтарини шаҳри Гулистон ба ҳисоб рафта, дар 5 моҳи соли равон ба маблағи 81,8 млн. сомонӣ маҳсулот истеҳсол намудааст.
Ҳамзамон манбаъ хабар додааст, ки дар корхонаҳои саноатии шаҳри Гулистон давоми панҷ моҳи соли равон ба маблағи беш аз 1 млрд. 717 млн. 304 ҳазор сомонӣ маҳсулот истеҳсол гардида, корхонаҳо бо 16 кишвари ҷаҳон робитаи тиҷоратӣ доранд.
Ҳамзамон ахиран мақомоти вилояти Суғд дар шаҳраки Консойи шаҳри Гулистон бо фаъолияти корхонаи хурди заргарии “Зари тоҷик” шинос шуданд.
Ин коргоҳ аз соли 2012 инҷониб фаъолият дорад. Дар он истеҳсоли маҳсулоти заргарӣ бо истифода аз ашёи хоми ватанӣ, тиллову нуқра ва дигар металҳои қимматбаҳо ба роҳ монда шудааст.
Раҳбарияти ин коргоҳ таъкид намудааст, ки корхона минбаъд бо дизайни нав ва мутобиқ ба талаботи бозор маҳсулот истеҳсол ва барои фурӯш омода карда мешавад.
Расиси вилояти Суғд Раҷаббой Аҳмадзода дастур дод, ки дар оянда армуғонҳои миллӣ низ омода ва барои рушду пешрафти корхона мутахассисони ҷавон ба кор ҷалб карда шаванд.