ДУШАНБЕ, 5 июн — Sputnik. Талабот ба таҳсилоти олии Русия дар Тоҷикистон дар сатҳи хеле баланд қарор дорад. Дар ин бора Вазорати умури хориҷии Русия иттилоъ дод.
Ба иттилои манбаъ, айни ҳол дар муассисаҳои олии таълимии Русия беш аз 35 ҳазор донишҷӯ ва аспирантҳои тоҷик таҳсил доранд.
Таъкид шудааст, ки ин омор ҳама шаклҳои таҳсил ва донишҷӯёни филиалҳои донишгоҳҳои Русия дар хориҷа ва созмонҳои муштараки таълимиро фаро мегирад.
ВУХ инчунин зикр намудааст, ки дар соли таҳсили 2022 - 2023 дар мактабҳои тоҷикӣ як гурӯҳи омӯзгорони русӣ иборат аз 74 нафар фаъолият доранд.
Ин дар ҳолест, ки ахиран мақомоти маорифи Русия таъкид карда буданд, ки ният доранд, ҳузури маорифи русиро дар хориҷи кишвар густариш диҳанд.
Вазорати маорифи Русия эълон кард, ки дар назар аст дар Тоҷикистон филиалҳои донишгоҳҳоро боз кунанд.
Ноиби вазири маориф, Константин Могилевский таъкид намуд, ки ҳоло бо бархе кишварҳо музокирот барои ифтитоҳои филиалҳо фаъолона идома доранд.
Вай қайд кард, ки таҳсилоти Русия яке аз беҳтаринҳо дар ҷаҳон аст ва дар бисёре аз кишварҳо талабот дорад.