ДУШАНБЕ, 5 июн — Sputnik. Дидгоҳҳои Русия ва Тоҷикистон дар бисёре аз масъалаҳои рӯзномаи Афғонистон ба ҳам мувофиқанд, хабар медиҳад Вазорати корҳои хориҷии Федератсияи Русия.
Ба иттилои дафтари матбуоти вазорати хориҷаи Русия, зарурати таъсиси ҳукумати фарогир дар Афғонистон, мубориза бо терроризм ва тавлиди маводи мухаддир, муҳоҷират ва ҳуқуқи башар аз мавзуотест, ки ҷонибҳо дидгоҳҳои яксон доранд.
Дар робита ба ин масъалаҳо, ба гуфти вазорат, миёни Маскав ва Душанбе ҳамкориҳои судманд ба роҳ монда шудааст.
Он ҳам дар формати дуҷониба ва ҳам дар доираи платформаҳои бисёрҷонибаи минтақавӣ: формати Маскав, СПАД, СҲШ, механизми кишварҳои ҳамсояи Афғонистон ва ғайра сурат мегирад.
Тавре дар Вазорати корҳои хориҷии Русия таъкид кардааст, пойгоҳи низомии 201-уми Русия ҳамчун як садди боэътимод дар роҳи паҳншавии ифротгароӣ, терроризм ва гардиши ғайриқонунии маводи мухаддир хизмат мекунад.
"Ҳузури низомии мо дар Тоҷикистон - бузургтарин дар хориҷ аз Русия - омили муҳими суботу амният дар минтақа буда, ба манофеъи ҳама муттаҳидони СПАД ҷавобгӯ аст", - гуфт ниҳоди дипломатӣ.
Ёдовар мешавем, ки Сергей Лавров-вазири корҳои хориҷаи Русия бо як сафари расмӣ вориди Тоҷикистон шуд.
Дипломати рус дар ҷараёни сафараш ба Душанбе бо Эмомалӣ Раҳмон, раисиҷумҳур ва Сироҷиддин Муҳриддин, вазири умури хориҷии Тоҷикистон мулоқот хоҳад кард.
Интизор меравад, ки ҷонибҳо масъалаҳои муҳим ва дурнамои ҳамкориҳои ду кишварро дар заминаҳои сиёсӣ, тиҷорат, иқтисод ва гуманитарӣ баррасӣ кунанд.