ДУШАНБЕ, 29 апр — Sputnik. Табибони тоҷик бори аввал дар "Маркази ҷумҳуриявии илмии ҷарроҳии дилу рагҳо"-и дар се гирифтори бемории фарбеҳӣ амали буриши меъдаро анҷом доданд, иттилоъ додааст Вазорати атндурустӣ ва ҳифзи иҷтимоии аҳолии Тоҷикистон.
Таъкид шудааст, ки ҷарроҳӣ бомуваффақият гузаронида шуда, дар шабонарӯзҳои пас аз ҷарроҳӣ ҳолати беморон нисбатан қаноатбахш буда, дар бистар ва ҳуҷра фаъол мебошанд.
Вазорати тандурустӣ қайд кардааст, ки амалиёти мазкур ба таври лапораскопӣ, бе буриши калони шиками бемор гузаронида шуд, ки ин дар соҳаи ҷарроҳии мамлакат дастовард ба ҳисоб меравад.
“Ахиран пас аз дастрас намудани таҷҳизот ва лавозимоти зарурӣ табибони Тоҷикистон ва Туркия дар Маркази ҷумҳуриявии илмии ҷарроҳии дилу рагҳо дар се нафар гирифтори бемории фарбеҳӣ амали буриши меъдаро бомуваффақият гузарониданд”,- хабар додааст вазорат.
Табибони тоҷик дар оянда нақша доранд, ки гузаронидани чунин навъи амалиётро дар беморон васеъ ба роҳ монанд.
Бояд гуфт, ки тайи солҳои охир масъалаи зиёд шудани фарбеҳӣ дар байни аҳолӣ мутахассисони соҳаи тибро ба ташвиш овардааст. Ҳоло пешгирии фарбеҳӣ масъалаи афзалиятноки соҳаи тандурустии аксари кишварҳои ҷаҳон ба ҳисоб меравад.