ДУШАНБЕ, 19 апр — Sputnik. Уламои дин бояд мардумро аз исён алайҳи гуруҳи толибҳо боздоранд, дастур додааст роҳбари ин гуруҳ, Ҳибатуллоҳ Охундзода.
Ба гузориши расонаи "Ҳашти субҳ", раҳбари ғоибонаи гурӯҳи толибҳо дар паёмаш ба муносибати иди Фитр ба масъулияти уламои дин дар Афғонистон таъкид карда, афзудааст, тавассути минбарҳои масҷидҳо ба мардум арзишҳои низоми исломиро тавзеҳ диҳанд
"Уламои дин муваззафанд, мардумро огоҳ созанд ва ислоҳ кунанд, то мардумро аз "исён" бар зидди ин гурӯҳ боздоранд", - омадааст дар матлаб.
Вай ҳамчунин таъкид кардаст, ки таъсири зеҳнӣ ва ахлоқии "ишғолгарон" бо ислоҳот дар бахшҳои фарҳангӣ, маориф, иқтисод ва расонаҳо ба поён мерасад.
Дар паёми идонаи раҳбари толибҳо, ислоҳоти қазоии ин гурӯҳ, фаъолияти вазорати амр ба маъруф ва наҳй аз мункар, тиҷорат, дахолати кишварҳои ҳамсоя ва ҷаҳон ба умури дохилии Афғонистон , ҷамъоварии гадоён баррасӣ шудааст.
Дар баробари ин роҳбари толибҳо аз таъминоти ҷангиён, таълиму тарбия, нигаҳдории тандурустӣ ва таъмини бехатариро ба миён гузоштааст.
Маврид ба зикр аст, ки толибҳо ҳукумат дар Афғонистонро нимаи моҳи август ғасб карда, аз ташкили аморати исломӣ хабар доданд. Эълон карданд, ки давлатро бар асоси қонунҳои шариат идора хоҳанд кард.
Бархе аз дороиҳои ҳукумати қаблии Афғонистон дар хориҷи кишвар баста шуданд, ки ба гуфтаи худи толибҳо боиси шиддати вазъи иҷтимоию иқтисодӣ дар кишвар гардид. Созмонҳои байналмилалӣ аз вазъи бади башарӣ дар Афғонистон, фақри зиёду нархҳои гарон ва таҳдиди гуруснагӣ ҳушдор медиҳанд.
Ҷомеаи ҷаҳонӣ ва фаъолони Афғонистон аз ҳукуматдорони толиб дар ин кишвар ташкили ҳукумати ҳамашумул ва риояи ҳуқуқҳои бунёдии инсониро талаб доранд.