ДУШАНБЕ, 10 апр — Sputnik. Давоми ҳафтаи сипаришуда бо истифода аз имкониятҳои камераҳои "Шаҳри бехатар"- и Раёсати ВКД дар Вилояти Мухтори Кӯҳистони Бадахшон қоидавайронкуниҳои ҳаракат дар роҳ ба монанди дар ҷои ғайримуқаррарӣ таваққуф намудани воситаҳои нақлиёт ошкору муайян ва нисбати ронандагон чорабиниҳои таъсиррасони ҳуқуқӣ андешида шуд.
Дар ин бора Раёсати ВКД дар Вилояти Мухтори Кӯҳистони Бадахшон хабар додааст.
Манбаъ таъкид кардааст, ки чунин навъи қоидавайронкунӣ ба тамбашавии сунъии ҳаракат дар роҳ мерасонад ва ба ҳаракати бонизоми нақлиёти мусофиркашони ҷамъиятӣ ва дигар намуд воситаҳои нақлиёт халал ворид менамояд.
Ҳамзамон Раёсати ВКД дар ВМКБ рӯйхати ҳафт нафар қоидавайронкуни ҳаракати роҳро расонаӣ карданд.
Ба иттилои манбаъ, ронадаҳо бештар барои итоат накардан ба аломати роҳ ва таваққуфи нодуруст ҷарима шудаанд.
“Дар натиҷа нисбати ронандагон аз рўи қоидавайронкунии содирнамудаашон бо моддаи 324 Кодекси ҳуқуқвайронкуниии маъмурии Тоҷикистон протоколҳои маъмурӣ тартиб дода шуда, барои минбаъд риоя намудани Қоидаҳои ҳаркати роҳ аз ҷониби нозирони роҳ суҳбатҳои профилактикӣ гузаронида шуд”,- таъкид намудааст Раёсати ВКД дар ВМКБ.
Инчунин манбаъ илова кардааст, ки нисбати як ронандаи дигар дар ҳудуди шаҳри Хоруғ ба таври ғайриқонунӣ бо шишаҳои сиёҳ мошинро идора мекард протоколи маъмурӣ тартиб дода шуда, автомашинаи ӯ ба майдончаи ҷаримавӣ бурда шуд.