ДУШАНБЕ, 10 апр — Sputnik. Кӯдаки 2-сола тоҷик, ки рӯзи 9 апрел дар вилояти Ленинград аз тирезаи бинои 4 ошёна ба поён сарозер шуд, дар бемористон ҳамроҳ бо модаркалони худ бистарӣ аст.
Дар ин бора намояндаи Сафорати Тоҷикистон дар Русия ба Sputnik Тоҷикистон хабар дод.
"Кӯдаки аз ошёнаи чорум сарозер шуд ва дар ҳолати ниҳоят вазнин ба беморхона интиқол ёфт. Вазъи саломатии ӯ нисбат ба як рӯзи пеш андаке беҳтар аст", - афзуд манбаъ.
Ин ниҳод гуфт, вазъияти мазкур феълан таҳти пайгирии сафорат ва консулгарии генералии Тоҷикистон дар шаҳри Санкт-Петербург қарор дорад.
"Кормандони консулгарӣ кӯмаки молию пулӣ расонданд ва минбаъд низ ин хонаводаро дастгирӣ мекунанд", - илова намуд намояндаи сафорат.
Ҳодисаи мазкур дар кӯчаи Первомайская рух дод. Тибқи иттилои пешакӣ, ноболиғ аз беназоратии калонсолон аз тирезаи манзил ба берун афтодааст.
Қаблан низ чунин ҳодисаи нохуш рух дода буд. он замон кӯдаки панҷсола аз тирезаи бинои 18 ошёна ба поён сарозер шуда, то расидани мошини ёрии таъҷилӣ дар ҷои ҳодиса ба ҳалокат расид.