ДУШАНБЕ, 18 мар – Sputnik. Дар гардиши кӯчаи Зарнисор, ки аз ҳудуди маҳаллаи Зарафшон мегузарад,садамаи маргбори нақлиётӣ рух дод, хабар медиҳад дафтари матбуоти Кумитаи ҳолатҳои фавқулодаи Тоҷикистон.
Ба иттилои манбаъ, садама шаби 17 ба 18 март, тахминан соати 00:58 дақиқаи ба вақти маҳаллӣ рух додааст.
Манбаъ меафзояд, поси шаб ба дафтари онҳо хабар дар бораи рух додани садамаи мудҳиш расид ва наҷотбахшон пас аз қабули маълумот ба ҷои ҳодиса сафарбар шуданд.
Маълум гардид, ки ронандаи мошини тамғаи “Мерседес-Бенс”, идораи мошинро аз даст дода, бо суръати баланд ба садди бетонии канори роҳ бархӯрдааст.
“Дар натиҷаи бархӯрд мошин оташ гирифта, ронанда дар ҷойи ҳодиса ба ҳалокат расид”, - омадааст дар хабарномаи КҲФ.
Ин ниҳод мегӯяд, наҷотбахшон ҳамроҳ бо оташнишонони Вазорати корҳои дохилӣ сӯхторро хомӯш карда, оқибатҳои садамаро низ бартараф намуданрд.
Шахсияти ронандаи ҳалокшуда феълан номаълум буда, ниҳодҳои марбута дар ин самт кор мекунанд.