ДУШАНБЕ, 11 мар — Sputnik. Дар шаҳри Ваҳдат сокини 15 - солаи маҳаллӣ тағояшро корд зад. Дар ин бора дафтари матбуоти Вазорати корҳои дохилӣ хабар дод.
Ба иттилои манбаъ, ҳодисаи нохуш нисфирӯзӣ аснои сар задани ҷанҷол миёни ҷиян ва тағо рух додааст.
"Ноболиғи 15-сола шаҳри Ваҳдат, дар аснои ҷанҷол тағояш, марди 49-соларо бо корди ошхонагӣ 1 маротиба ба қисмати шикамаш задааст", - омадааст дар хабарнома.
Ин ниҳод сабаби ҷанҷоли онҳоро ифшо накардааст, танҳо зикр намуд, ки "ҷабрдида мутобиқи маълумотномаи пешниҳоднамудаи беморхона ҷароҳати ҷисмонӣ дар шакли захми халидаю бурандаи ковокии шикам ва хунравии дохила, ки боиси вазнин шудани вазъи саломатиаш мебошад, бардоштааст".
ВКД Тоҷикистон мегӯяд, феълан аз рӯи ҳодисаи рухдода тафтишот идома дорад.