ДУШАНБЕ, 6 мар — Sputnik. Дар мавсими ниҳолшинонӣ ва сабзазоркунии тирамоҳи соли 2022 ва баҳори соли 2023 дар Тоҷикистон шинонидани қариб 1,2 миллион бех ниҳол ба нақша гирифта шудааст.
Дар ин бора хабаргузории "Ховар" бо такя ба Кумитаи ҳифзи муҳити зисти назди ҳукумати Тоҷикистон хабар дода афзудааст, ки нақша шомили дарахтони ҳамешасабзу ороишӣ мебошад.
Манбаъ афзуд, ки то ҳол қариб 700 ҳазор бех ниҳоли дарахтони ҳамешасабзи ороишӣ ва мевадиҳанда шинонида шудааст, ки аз он 250 ҳазор бех сояафкан, 310 ҳазор бех ниҳоли дарахтони ҳамешасабзу ороишӣ ва 51 ҳазор ниҳоли дарахтони мевадиҳанда мебошад.
Таъкид шудааст, ки ҳоло бо фарорасии фасли баҳор маъракаи ниҳолшинонӣ дар шаҳру навоҳии мамлакат босуръат идома дорад.
Зикр гардидааст, ки ҳамасола дар мавсими ниҳолшинонӣ дар мамлакат беш аз 1 миллион бех ниҳоли дарахтони гуногуни сояафкану ороишӣ ва мевадиҳанда шинонида мешавад, ки бархеяшон намесабзанд.
Дар қатори сабабҳои насабзидани қисме аз ниҳолҳо, номусоидии боду ҳаво, нодуруст шинонидан, об надодан ва нигоҳубину парвариш накардан, зикр гардидаанд.
Мутахассисон изҳор медоранд, ки кандану интиқоли ниҳол аз як минтақа ба минтақаи дигар муҳлат дорад ва дар сабзишу нашъунамои он дар оянда нақши муҳим мебозад.
Таъкид гардидааст, ки ҳангоми шинонидани ниҳоли дарахтон бояд тарзу усули шинонидан риоя гардад.