ДУШАНБЕ, 1 мар — Sputnik. Пас аз заминҷунбии маргбор дар Туркия, Озарбойҷон сохтмони биноҳои истиқоматии аз 9 ошёна болоро манъ мекунад.
Расонаҳои озарӣ аз қавли вакили парлумонашон, Воҳид Аҳмадов изҳор доштаанд, ки нақшаи дасткашӣ аз бунёди бисёрошиёнаҳо дар ҳукумат қарор дорад.
Ӯ афзудааст, ки то ҷое маълумот дорад, нақшаи қатъи сохтмони манзилҳои баландошёна аллакай таҳия шудааст.
Муҳокимаҳо дар бораи хатари бунёди биноҳои истиқоматии аз 9 ошёна боло бар асари эҳтимоли сар задани заминҷунбии шадид дар Озарбойҷон муддати тӯлонӣ идома доранд.
Ин масъала дар ҳоле ба миён гузошта шудаст, ки заминҷунбии 6 феврал дар Туркия беш аз 45 ҳазор кушта бар ҷой гузошт.
Дар пайи ин офати харобиовар дар Тоҷикистон низ Комиссияи махсус ташкил гардид, ки тобоварии биноҳои баландошёна ба зилзила дар 3 шаҳри бузурги кишвар – Душанбе, Хуҷанд ва Бохтарро месанҷад.
Дар ин комиссия аз раёсати Кумита, Хадамоти назорати давлатии меъморӣ ва сохтмон, Институти геология ва сейсмологияи Академияи миллии илмҳо, Пажуҳишгоҳи илмӣ-татқиқотии сохтмон ва меъморӣ, корхонаи воҳиди давлатии “Лоиҳакаш” ва дигар мутахассисон узвият доранд.