ДУШАНБЕ, 1 мар — Sputnik. Моҳҳои апрел-майи соли 2023 шаҳрвандони ҷинси марди то рӯзи даъват ба синни 18 расида ва калонтар, ки ҳуқуқи ба таъхир андохтани муҳлати даъват ё озод будан аз даъват ба хизмати ҳарбиро надоранд, ба артиш даъват карда мешаванд.
Фармонро дар ин бора раисҷумҳури Тоҷикистон, Эмомалӣ Раҳмон имзо кард.
Бар асоси фармон, ба хизмати ҳарбӣ дар мавсими баҳорӣ шаҳрвандони солҳои таваллудашон 1996 - 2005 даъват карда мешаванд.
Хизматчиёни ҳарбие, ки муҳлати муқарраргардидаи хизмати ҳарбиро адо намудаанд, моҳҳои апрел-майи соли 2023 аз сафи артиш ба эҳтиёт рухсат мешаванд.
Вазорати мудофиаи Тоҷикистон, раисони комиссияҳои даъват бо иштироки намояндагони мақомоти амният ва корҳои дохилӣ муваззаф шудаанд, даъвати шаҳрвандонро амалӣ намоянд.
Таъкид шудааст, ки аз ҳисоби интихоби дақиқи даъватшавандагон ба қӯшунҳои сарҳадӣ, Гвардияи миллӣ ва қисмҳои ҳарбии таъиноти махсус, бо дарназардошти хусусиятҳои хоси хизмат дар ин воҳидҳо ва дар навбати аввал пурра гардонда шаванд.
Раисони шаҳру ноҳияҳо якҷо бо комиссариатҳои ҳарбӣ дастур гирифтаанд, ки даъвати муташаккилонаи шаҳрвандонро ба хизмати ҳарбӣ ба роҳ монанд.
Ба Вазорати тандурустӣ ва ҳифзи иҷтимоии аҳолии ҷумҳурӣ супориш шудааст, ки барои муоинаи назоратии тиббии даъватшавандагон табибону мутахассисони ботаҷрибаро сафарбар намояд.
Маврид ба зикр аст, ки даъвати ҷавонон дар Тоҷикистон дар тирамоҳ моҳҳои октябр, ноябр ва дар баҳор моҳҳои апрел, май амалӣ мешавад.