ДУШАНБЕ, 28 фев — Sputnik. Раисиҷумҳури Беларус Александр Лукашенко гуфт, ҳоло як лаҳзаи беназир барои қатъи низоъ дар Украина аст.
Вай дар ин бора дар мусоҳиба бо расонаҳои чинӣ, ки гузхинаи телевизионии он дар шабакаи телевизионии "Беларус 1" пахш шудааст, изҳор дошт.
Ба гуфтаи раҳбари Беларус, дигар чунин вазъ шояд ба миён наояд.
"Ҳоло як вазъияти нотакрор вуҷуд дорад, ман инро мебинам ва эҳсос мекунам, ки кай ба ин муноқиша хотима додан мумкин аст. Шояд дигар ба ин монанд набошад", - гуфтааст мавсуф.
Лукашенко даъват кард, ки аз ин лаҳза истифода баранд, то он даме, ки Русия иқтисоди худро ба пояи низомӣ бикашад.
Ҳадафи раисиҷумҳури Русия Владимир Путин, ба гуфтаи раҳбари Беларус, пеш аз ҳама таъмини амнияти кишвараш аст. Ин барои рафъи эҳтимоли ҳамлаи Украина зарур буд.
Вай таъкид кард, ки Маскав ҳоло ҳам омода аст бо роҳи музокирот пеш равад.
"Русия имрӯз омода аст, ки барои ҳалли мусолиматомез иқдом кунад. Аз рӯзҳои аввал ин корро мекунад: ду даври музокирот оид ба ҳалли мусолиматомез дар Беларус баргузор шуд", - ёдовар шуд Лукашенко.
Ба андешаи ӯ, кишварҳои ғарбӣ ва ИМА Киевро водор кардаанд, ки ҳеҷ гуна музокира накунад.
Вай ҳамчунин афзуд, ки дер ё зуд ҳама гуна ҷанг бо сулҳ анҷом мешавад ва ҷанги кунунӣ низ истисно нест.
"Бинобар ин, илоҷи дигаре ба ҷуз бастани шартномаи сулҳ ҳоло вуҷуд надорад. Бидуни шартҳои пешакӣ", - итминон дорад президенти Беларус.