ДУШАНБЕ, 13 фев – Sputnik. Раиси ҷамоати деҳоти Сарикиштии ноҳияи Рӯдакӣ барои порагирию харидуфурӯши ғайриқонунии замин дастгир шудааст.
Дар ин бора Ожонси зиддин фасоди Тоҷикистон хабар дода, афзуд, ки муттаҳам аз як корафтода барои дуруст кардани ҳуҷҷатҳои замини наздиҳавлигӣ дар масоҳати 10 ҳисса ба сифати пора 17 ҳазор сомонӣ талаб кардааст.
Манбаъ тавзеҳ дод, ки раиси ҷамоат дар ду ҳолат 12 ҳазор сомониро гирифта, овардани маблағи боқимондаро талаб кардааст.
Муаттаҳам ҳангоми аз шаҳрванд гирифтани 5 ҳазор сомонӣ ҷойи ҳодиса дастгир гардида, маблағ ҳамчун далели шайъӣ мусодира гардад.
Таъкид шудааст, ки парванда алайҳи дастгиршуда бо иттиҳоми порагирӣ ба додгоҳ ирсол шуд.
Нашри ин гузориш дар ҳолест, ки моҳи қабл Ҳикматуллозода Абдуғаффор аз вазифаи муовини якуми прокурори генералии Тоҷикистон озод шуда, раиси ноҳияи Рӯдакӣ таъйин гардид.
Таъйини прокурори собиқадор ба вазифаи раиси ноҳияи Рӯдакӣ дар ҳолест, ки қаблан Эмомалӣ Раҳмон муомилоти ғайриқонунӣ бо заминро дар ин ноҳия аз мушкилоти ҷиддӣ арзёбӣ намуда буд.