ДУШАНБЕ, 10 фев — Sputnik. Русия сохтмони посгоҳи марзӣ дар сарҳади Тоҷикистону Афғонистонро маблағгузорӣ мекунад, изҳор дошт директори департаменти сеюми кишварҳои ИДМ-и Вазорати корҳои хориҷии ФР, Александр Стерник дар суҳбат бо РИА "Новости".
"Ин як иншооти замонавӣ хоҳад буд, ки ба тамоми талаботи амнияти сарҳадӣ ҷавобгӯ аст. Сохтмони он саҳми мо дар таъмини марзи ҷанубии минтақаи масъулияти СПАД аст", - афзуд ӯ.
Вай таъкид намуд, ки Русия чун иттиҳодчӣ кумакро барои Тоҷикистон идома хоҳад дод.
Қаблан раисҷумҳури Тоҷикистон, Эмомалӣ Раҳмон аз хатарҳои бархоста аз Афғонистон ҳушдор дода, таъкид намуд, ки тайи 2 соли охир дар марз бо ин кишвар 175 иншооти сарҳадӣ сохта ба истифода дода шудаанд. Вай афзуд, ки сохтмони боз 300 иншооти дигар дар назар аст.
Раҳмон ҳамчунин татбиқи ташаббуси Тоҷикистон - консепсияи "камарбанди амниятӣ" дар атрофи Афғонистон ба манзури пешгирӣ ва коҳиш додани паёомадҳои хатару таҳдидҳоро таъкид намуд.
Ба гуфтаи президент, ба бунёди иншоти амниятӣ аз ҷумла соҳибкорон низ довталабона ҷалб гардидаанд. Дар маҷмуъ зиёда аз 50 дидбонгоҳи марзӣ дар Тоҷикистон аз сӯи соҳибкорони кишвар бунёд шуда истодаанд.
Ӯ дар паёми ахираш ба парлумон гуфт, вақте суҳбатҳоро дар мавриди зарурати ҳифзи марзи Тоҷикистон шуниданд, соҳибкорон худашон барои бунёди иншооти низомӣ ташаббус нишон додааст.
Ба иттилои раисҷумҳур феълан бунёди зиёда аз 30 дидбонгоҳи сарҳадӣ бо саҳми соҳибкорон шуруъ шуда, беш аз 20 адади дигар дар нақшаанд.