ДУШАНБЕ, 8 фев — Sputnik. Теъдоди ҳалокшудагон бар асари заминларза дар Туркия аз 8,5 ҳазор нафар гузашта, шумораи маҷруҳон наздики 50 ҳазор нафар расид.
Омори охири дақиқи қурбониёнро президенти Туркия, Раҷаб Тайиб Эрдуғон зимни мулоқот бо хабарнигорон баён дошт.
"Тибқи маълумоти охирин, 8 ҳазору 574 нафар кушта ва 49 ҳазору 133 нафар маҷрӯҳ шуданд", - гуфт ӯ дар брифинг.
Ба иттилои раисҷумҳури Туркия, дар вилоятҳои осебдида 6444 бино тахриб шудаанд.
Маврид ба зикр аст, ки субҳи 6 феврал дар вилояти Қаҳрамонмараш заминларзаи 7,7 дараҷаӣ рух дод. Тавре Эрдуғон қайд кард, ин заминҷунбӣ пурқувваттарин аз соли 1939 ба ин сӯ маҳсуб меёбад.
Заминларзаҳо дар Туркия қариб 3 рӯз идома доранд. Ба дунболи заминларзаи 7,7-балӣ даҳҳо пасларза ба қайд гирифта шудааст, ки қавитарини он ва дар нимаи руз бо тавоноии 7,6-балӣ рух дод.
Дар пайи офати табии марговар президенти Туркия мотами ҳафтрӯзаи миллӣ эълон кард, ки интизор меравад то 12 феврал идома хоҳад кард. Дар 10 вилояти аз офати табиӣ осебдида барои се моҳ вазъи изтирорӣ эълон гардид.
Заминларза ба Сурия низ осеб расонд. Нисбатан бештар минтақаҳои Алеппо, Латакия, Ҳама ва Тартус осеби ҷиддӣ диданд. Тибқи маълумоти охирини вазорати тандурустии Сурия, бар асари заминҷунбӣ беш аз 1200 нафар кушта, ҳудуди 2 ҳазор нафар маҷрӯҳ гардиданд.