ДУШАНБЕ, 30 янв — Sputnik. Раисҷумҳури Тоҷикистон Эмомалӣ Раҳмон ба Сарвазири Покистон Шаҳбоз Шариф барқияи изҳори тасаллӣ ирсол кардааст, иттилоъ додааст дафтари матбуоти раисҷумҳур.
“Хабари фоҷеабори ба ҳалокат расидан ва ҷароҳат бардоштани шумораи зиёди шаҳрвандони Покистон бар асари амали террористии интиҳорӣ дар яке аз масҷидҳои шаҳри Пешовар боиси андӯҳи беандозаи мо гардид”, - гуфта шудааст дар барқияи изҳори тасаллии раисҷумҳур.
Эмомалӣ Раҳмон дар барқияи худ қайд кардааст, ки ин амали террористии золимонаро қотеона маҳкум мекунад.
“Ба Шумо, наздикону пайвандони фавтидагон ва тамоми мардуми бародари Покистон ҳамдардиву таслияти амиқи ин ҷонибро изҳор менамоем ва хоҳони шифои комили ҳамаи маҷруҳшудагон ҳастем”,- афзуд Эмомоалӣ Раҳмон.
Ёдовар мешавем, ки ахиран дар яке аз масҷидҳои шаҳри Пешовар таркиши мудҳиш сурат гирифт.
Тибқи иттилои расонаҳо ин амали даҳшатнокро як маргталаб анҷом дод.
Расонаҳои маҳалӣ хабар медиҳанд, ки теъдоди кушташудаҳо дар ин амали террористӣ ба 44 нафар расид ва садҳо нафари дигар захм бардоштанд.