ДУШАНБЕ, 29 дек — Sputnik. Размикори тоҷик Фаридун Одилов ба феҳристи вазнҳои сабуки Absolute Championship Akhmat.шомил шуд.
Дар ин бора дафтри матбуотии ташкилот хабар додааст.
Санаи баргузории набард ва номи рақиби аввали Одилов дертар эълон хоҳад шуд.
Терминатори тоҷик то кунун 12 пирӯзӣ (аз он 10-тоашро пеш аз мӯҳлат ба даст овардааст), 2 мусовӣ ва 2 бохт дорад.
Охирин набарди Одилов моҳи декабри соли 2021 доир гардид, ки размикори 29-солаи тоҷик Эноко Торреси испаниро шикаст дод. Мубориза 3 дақиқаю 37 сония давом карда, дар даври якум ба охир расид.
Моҳи декабри соли равон ӯ мебоист бо Даврон Ермекови қазоқ қувваозмоӣ мекард, аммо аз вазнченкунии назоратӣ гузашта натавонист. Дар натиҷа, варзишкори тоҷик аз Eagle FC ихроҷ шуд.
Гуфта мешуд, ки дар сурати пирӯзӣ бар варзишгари қазоқ, Одилов роҳро ба созмони UFC боз мекард.