ДУШАНБЕ, 22 дек — Sputnik. Эъломи толибон дар бораи мамнӯъияти рафтани духтарон ба донишгоҳҳо дар саросари Афғонистонро охирин нақзи ҳуқуқи бунёдии башар аст, мегӯяд Носир Аҳмад Фоиқ, раҳбари намояндагии доимии Афғонистон дар СММ.
Ӯ ахиран бо нашри баёнияе аз нишасти Шӯрои Амнияти Созмони Милал дар бораи авзоъ дар Афғонистон гуфт, ба тағйироти мусбат ва пешрафт дар авзои иҷтимоӣ, иқтисодӣ, амниятӣ ва сиёсии Афғонистон умед нест.
Дар матни баёния далели ин ноумедӣ нокомии толибон дар расидагӣ ба бӯҳрони феълӣ ва нокомии ин гурӯҳ дар мубориза бо терроризм аст.
Ба гуфтаи Фоиқ, толибон ба қонуну равишҳои ғайриинсонӣ ва сахтгиронаи худ баргашта, ба тозиёна задан, буридани дастҳо ва эъдомҳои оммавӣ даст мезананд.
Намояндаи Афғонистон дар Созмони Милали Муттаҳид афзуд, дар низоми додгоҳии толибон шаффофият нисбати афроди муттаҳам ба ҷиноят вуҷуд надорад ва низоми додгоҳии ин кишвар ба сурати умум фаъол нест.
Номбурда афзудааст, ки ин гуруҳ то ҳол ҳеҷ қонуни навро дар рӯзномаи расмӣ нашр накардаанд ва озодии баёну матбуотро саркӯб мекунанд. Занони эътирозгар ва сарбозони собиқро боздошту шиканҷа ва ба қатл мерасонанд.
Ҳамчунин ин гуруҳ хонаводаҳо дар вилоятҳои Сарипул, Бағлон, Бадахшон ва Панҷшерро муҷозот ва маҷбур ба кучи иҷборӣ мекунанд.
Ин дар ҳолест, ки ахиран Роза Отунбоева, раиси намояндагии Созмони Милал дар Афғонистон (UNAMA) низ дар нишасти Шӯрои амнияти СММ гуфт, мардуми Афғонистон аз бархӯрди ҷомеъаи ҷаҳонӣ нисбат ба ин кишвар ноумед шудаанд. .