ДУШАНБЕ, 20 дек — Sputnik. Дар ҷаласаи комиссияи ҳамлу нақли Тоҷикистон ва Беларус, ки ахиран дар шаҳри Душанбе баргузор шуд Тоҷикистон ва Беларус ба мувофиқа расиданд, ки табодули варақаҳои иҷозатномадиҳӣ барои ҳамлу нақли байналмилалии автомобилиро то соли 2023 вусъат диҳанд, иттилоъ додааст маркази матбуоти Вазорати нақлиёти кишвар.
Ҳайати Беларус таҳти сарварии сардори Раёсати нақлиёти автомобилӣ ва мусофирбарии шаҳрии Вазорати нақлиёт ва коммуникатсия Андрей Гладкийро Вазири нақлиёти Тоҷикистон Азим Иброҳим ба ҳузур пазируфт.
Зимни мулоқот таъкид гардид, ки ҳамкории дуҷонибаи Тоҷикистон ва Беларус дар соҳаи ҳамлу нақли байналмилалии автомобилӣ барои рушди дуҷониба иқтидори назаррас дорад.
“Ҳаҷми ҳамлу нақли бор миёни ду кишвар дар моҳҳои январ-ноябри соли 2022 нисбат ба ҳамин давраи соли 2020 афзоиш ёфтааст. Бо дарназардошти афзоиши ҳаҷми интиқоли бор тавассути нақлиёти автомобилӣ ва эҳтиёҷ ба ҳамлу нақли ду кишвар ҷонибҳо ба мувофиқа расиданд, ки соли 2023 теъдоди иҷозатномаҳо барои ҳамлу нақли муштараки автомобилӣ зиёд карда шавад”, — мегӯяд вазорати нақлиёт.
Илова бар ин, ҷонибҳо ба мувофиқа расиданд, ки ба рушди минбаъдаи интиқоли байналмилалии автомобилӣ миёни ду кишвар шароит фароҳам оварда шавад.