ДУШАНБЕ, 12 дек — Sputnik. Галаи гургҳо дар ноҳияи Рошқалъа рамаи бузу гӯсфандро ҳадафи ҳамла қарор дода, хисороти зиёд ворид кардаанд.
Тибқи иттилои КҲФ, ҳодиса баъди зуҳри 11 декабр дар чарогоҳи кӯҳӣ воқеъ дар деҳаи Сежд дар наздикии минтақаи Девлохи ноҳияи Роштқалъа рух додаст. Дар пайи ҳамлаи тӯдаи гургҳо 28 cap чорвои майда талаф ёфтааст.
КҲФ бо мақсади ҳифзи чорво аз ҳамлаи ҳайвоноти дарранда ба сокинони деҳоти ноҳияҳои кӯҳӣ якчанд тавсия додааст.
Аз ҷумла таъкид шудааст, ки чарондани озоди чорво, бидуни чӯпон қобили қабул нест. Муҳим хонда шудааст, ки чарондани чорво танҳо дар вақти рӯшании рӯз ва бо ҳамроҳии чӯпон сурат гирад.
Шабона чорво бояд дар ҳавлӣ ва ё худ оғилхонаҳо ҷой дода шавад, таъкид намудаст КҲФ.
Зарур дониста шудаст, ки атрофи оғилхонаҳо ва ё маконҳои дигари нигоҳдории чорво бояд бо симтӯр ё девори баландияш на кам аз 2,5 метр иҳота карда шавад. Ин иҳотагирӣ чорворо аз роҳёбии дарандаҳо, аз ҷумла гургу бабри барфӣ ҳимоят мекунад.
Ҳамчунин Кумитаи ҳолатҳои фавқулодда ва мудофиаи граждании Тоҷикистон муҳим хондааст, ки тамоми чорвое, ки дар пайи ҳамлаи дарандаҳо талаф ёфтааст, бояд аз тариқи сӯзондан нобуд карда шавад.
Фарорасии мавсими ҳамлаи гургҳо дар ҳолест, ки дар навоҳии куҳии Тоҷикистон чорводорӣ манбаи асосии даромади хоҷагиҳо ба шумор меравад.