ДУШАНБЕ, 28 ноя — Sputnik. Муассисаҳои тандурустии Тоҷикистон ҳолати қатъи интиқоли барқро пешбинӣ карда, омодагӣ дидаанд.
Дар муассисаҳои соҳаи тандурустии мамлакат 886 адад генераторҳои тавлиди барқ омода шуда, барои онҳо зиёда аз 57 ҳазор литр сӯзишворӣ захира гардидааст.
Вазорати тандурустии Тоҷикистон эълон дошт, ки дар сурати қатъи интиқоли барқ генераторҳои мазкур ба кор дароварда хоҳанд шуд.
Маврид ба зикр аст, ки бар асоси қарори ҳукумату фармоиши вазорат ситодҳо барои омодагӣ ба зимистон ташкил шуда, ба иттилои масъулин чораандешиҳо дар ин самт идома доранд. Сатҳи иҷрои нақшаи омодагӣ 99% арзёбӣ шудааст.
Қаблан як гуруҳи кории Вазорати маориф ва илми Тоҷикистон низ дар пайи санҷиш дар навоҳии ҷумҳурӣ муайян намуд, ки макотиб мушкили дастрасӣ ба нерӯи барқро доранд.
Раисҷумҳури Тоҷикистон, Эмомалӣ Раҳмон ахиран дар як мулоқоташ бо фаъолону сокинони шаҳри Норак маҳдудияти интиқоли барқ дар шаҳру навоҳиро эътироф намуд.
"Вале ин ҳолат муваққатӣ буда, ба хотири дар фасли сармо бо барқ пурра таъмин намудани аҳолӣ ҷорӣ шудааст", - изҳор дошт ӯ.
Дар зимн Эмомалӣ Раҳмон зикр намуд, ки дар шароити мураккаби замони муосир дар бархе аз давлатҳои мутараққӣ низ маҳдудиятҳо дар бахши энержӣ роҳандозӣ шудаанд.