ДУШАНБЕ, 15 ноя — Sputnik. Пирӯзӣ дар Ҷанги Бузурги Ватанӣ бидуни шак саҳми тамоми халқҳои Иттиҳоди Шӯравӣ мебошад, аммо талафоти асосиро дар ин ҷанг Русияи шӯравӣ дод.
Ин нуктаро раисҷумҳури Русия, Владимир Путин дар ҷаласаи кумитаи ташкилотии "Победа" изҳор дошт.
"Албатта, мо набояд ҳеҷ гоҳ фаромӯш кунем, ки Ғалабаро намояндагони тамоми халқҳои Иттиҳоди Шӯравӣ ба даст овардаанд. Мо онро ҳеҷ гоҳ фаромӯш накардаем ва нахоҳем кард", - гуфт Путин.
Вай афзуд, ки ин як воқеияти раднопазири таърихист ва дар баробари ин далели дигари таърихӣ, ин талафоти зиёди Русияи шӯравӣ мебошад.
"Ҳудуди 69, қариб 70%-и талафот дар Ҷанги Бузурги Ватанӣ ба Русияи шӯравӣ рост меояд ва ин ҳам як далели таърихӣ мебошад", - илова намуд президент.
Вай ҳамчунин ҳадафи таҳрифи таърихро на танҳо пинҳон кардани аъмоли ҷиноӣ дар гузашта, балки заминасозӣ барои зӯргӯӣ дар оянда хонд.
"Кӯшишҳои зиёде барои сохтакорӣ кардани таърих сурат мегиранд. Ин, албатта, барои фароҳам овардани фазои муносиб дар сиёсати имрӯза ва сохтани паёмҳои бардурӯғ ба хотири тақсими манфиатҳо роҳандозӣ мешавад", - гуфт Путин.
Вай илова намуд, ки ҳамчунин ба ин восита мехоҳанд, даст доштан дар ҷиноятҳои фашистонро пинҳон кунанд, балки барои амалҳои нави таҷовузкорона, аз ҷумла зидди Русия замина фароҳам оваранд.
Маврид ба зикр аст, ки дар оғози солҳои чилуми асри гузашта аз миёни аҳолии Тоҷикистон, ки ҳудуди 1 млн нафар буд, ба ҶБВ беш аз 300 ҳазор нафар эъзом шуданд, ки аз набардҳо 92 ҳазор нафарашон барнагаштанд.