ДУШАНБЕ, 14 ноя — Sputnik. Вазири умури дохилии Туркия Сулаймон Сойлу ахиран дар Истанбул гуфт, кишвараш аз қабули тасаллият аз Иёлоти Муттаҳида пас аз ҳамлаи террористӣ дар кӯчаи Истиқлол худдорӣ кард.
"Мо медонем, ки ҳамла дар куҷо ҳамоҳанг шудааст. Мо паёмеро, ки ба мо дода шудааст, гирифтем ва медонем, ки паёми кист. Мо тасаллияти сафорати Амрикоро қабул намекунем. Мо ба касе хиёнат накардаем, аммо дигар таҳаммули инҳоро надорем. Кӯчаи Истиқлол фарзанди мост. Агар мо ҳамлагарро дастгир намекардем, ӯ имрӯз ба Юнон фирор мекард”, - нақл мекунад телевизиони CNN Turk.
Сухангӯи Кохи Сафед Карин Жан-Пьер қаблан гуфт, ки Иёлоти Муттаҳида амали террористӣ дар Истанбулро маҳкум кард ва ҳамчунин ба хонаводаҳои қурбониён изҳори ҳамдардӣ баён кард.
Ёдовар мешавем, ки чанде пеш дар кӯчаи сайёҳии Истиқлол дар маркази шаҳри Истамбул таркиш сурат гирифт. Ба гуфтаи Раҷаб Тайиб Эрдуғон, раисиҷумҳури Туркия, дар натиҷа шаш нафар ба ҳалокат расиданд. Муовини раиси ҷумҳури Туркия Фуат Октай баъдан хабар дод, ки 81 нафар косеб дидааст. Дар байни онҳо се шаҳрванди Русия низ ҳастанд.