ДУШАНБЕ, 28 окт — Sputnik. Вазорати нақлиёти Тоҷикистон вазъи саломатии корманди Хадамоти давлатии назорату танзим дар соҳаи нақлиётро, ки зери чархи мошини боркаш монд, шарҳ дод.
Ба иттилои ин ниҳод, ҳодиса дар нуқтаи вазнченкунӣ дар мавзеи Султонободи ноҳияи Рӯдакӣ рух дод.
Тавзеҳ дода шудааст, ки ронандаи мошини боркаш, сокини ноҳияи Ёвон ба талаботи корманди Хадамоти давлатии назорату танзим дар соҳаи нақлиёт дар нуқтаи вазнченкинӣ дар мавзеи Султонобод итоат накарда, ӯро зер намудаст.
Ронанда, ки аз самти ноҳияи Рӯдакӣ сӯи Ёвон ҳаракат доштаст, танҳо дар масофаи 15-20 метр аз макони зер кардани масъули соҳаи нақлиёт истодаст.
Таъкид шудааст, ки ҳамкорон фавран ҷабрдидаро ба беморхонаи ноҳияи Рӯдакӣ оварда, пас аз расонидани ёрии аввалияи тиббӣ, ӯ ба беморхонаи Шаҳраки тиббӣ - "Медгородок"-и Душанбе интиқол дода шудаст.
Муоинаи тиббӣ мушаххас кардааст, ки ягона роҳи наҷот ҷарроҳӣ буда, як пои ҷабрдида бурида шуда, устухони пои дигараш низ кафидааст. Дар итилоия омадааст, ки вазъи саломатии бемор вазнин аст.
Дар мавриди ронанда зикр шудааст, ки чораандешӣ нисбати ӯ идома дошта, ба ҷавобгарӣ кашида хоҳад шуд.