ДУШАНБЕ, 22 окт — Sputnik. Котиботи Созмони Милал агар тасмим бигирад, ки дар таҳқиқи дурӯғини истифодаи ҳавопаймоҳои бесарнишини Эрон дар Украина ширкат кунад, Русия метавонад равобиташ бо созмонро бознигарӣ кунад.
Дар ин бора Василий Небензя намояндаи доимии Федератсияи Русия дар СММ зимни ҷаласаи Шӯрои амнияти созмон изҳор дошт.
"Агар коршиносони СММ ба манфиати пойтахтҳои ғарбӣ, ба ҳар ҳол беасос ба муқаррароти қатъномаи 2231 истинод карда, ба як навъ таҳқиқи дурӯғин машғул шаванд, мо метавонем тамоми доираи муносибатҳои худро бо Котиботи СММ бозбинӣ кунем, ки беғаразии онҳо дар ин маврид дигар мавриди баҳс нест", - гуфт Небензя.
Кишварҳои ғарбӣ иддао доранд, ки Русия гӯё дар Украина аз ҳавопаймоҳои бесарнишини Эрон истифода мекунад.
Рӯзи ҷумъа Фаронса, Бритониё ва Олмон аз СММ хостаанд, ки коршиносони худро ба Украина бифиристанд, то таҳқиқ кунанд, ки оё қатъномаи 2231, ки Эронро аз тиҷорати баъзе навъҳои маҳсулот аз ҷумла бесарнишинҳо бидуни иҷозаи пешакии Шӯрои Амнияти СММ манъ мекунад, иҷро мешавад ё на.
Маскав ва Теҳрон иттиҳоми Ғарбро дар истифодаи ҳавопаймоҳои бесарнишини Эрон рад карданд.
Дмитрий Полянский, муовини аввали намояндаи Федератсияи Русия дар СММ низ қаблан гуфта буд, ки Маскав ҳамкориҳояшро бо Котиботи СММ дар сурати ширкат дар “тафтишот”-и дархости Киев бозбинӣ хоҳад кард, зеро котибот як ниҳоди сирф фаннист ва ваколат ё қобилияти коршиносӣ барои чунин амалҳоро надорад.