ДУШАНБЕ, 18 окт – Sputnik. Бар асари сарозер шудани ҳавопаймои низомӣ ба бинои истиқоматии бисёрошёна дар дар шаҳри Ейск 13 нафар, аз ҷумла се кӯдак ба ҳалокат расидаанд.
Дар ин бора РИА "Новости" аз қавли ёвари вазири тандурустии Русия, Алексей Кузнетсов иттилоъ дода, афзуд, ки ҳамчунин 19 нафар ҷароҳат бардоштаанд.
"Тибқи маълумоти Вазорати ҳолатҳои изтирорӣ, пас аз тоза кардани харобаҳо дар ҷои суқути ҳавопаймо дар шаҳри Ейск ҷасади ҳалокшудаҳо пайдо шуд. То соати 06:00-и 18 октябр дар натиҷаи суқути ҳавопаймо 13 нафар ба ҳалокат расидаанд", - гуфтаст Кузнетсов.
Вай тавзеҳ дод, ки аз 19 нафари ҷароҳатбардошта 4 нафари онҳо барои табобат ба бемористони вилоятии Краснодар интиқол ёфта, боқимонда дар бемористони Ейск табобат мегиранд.
"Ба осебдидагон тамоми кумакҳои зарурии тиббӣ ва равонӣ расонида мешавад. Ин раванд таҳти назорати шахсии вазири беҳдошт Михаил Мурашко мебошад", - афзуд ёвар.
Мақомот мегӯянд, феълан тозасозии харобаҳо анҷом ёфта, дар ҷараёни амалиёти ҷустуҷӯӣ 68 нафар наҷот дода шуда, беш аз 360 нафар аз маҳалли ҳодиса берун карда шудаанд.
Вазорати ҳолатҳои изтирории Русия низ омори ҳалокшудаю маҷруҳонро таъйид кард, ки мутаносибан 13 ва 19 нафарро ташкил медиҳанд.
Маврид ба зикр аст, ки бегоҳи 17 октябр дар шаҳри Ейск як ҳавопаймои ҷангандаи фаросавтии Су-34-и Русия болои як бинои истиқоматӣ суқут кард, ки дар натиҷа сӯзишворӣ оташ гирифт.
Дар пайи ҳодиса панҷ ошёнаи аввали бинои истиқоматиро сӯхтор фаро гирифт, ки дар масоҳати 2000 метри мураббаъ доман густурд.
Дар зимн Кремл хабар дод, ки раисиҷумҳури Русия Владимир Путин гузориши вазирон ва волии Кубанро шунида, ба роҳбарони минтақа ва вазоратҳои ҳолатҳои изтирорию беҳдошт дастур додааст, ки барои кумак ба осебдидагон ба Ейск парвоз кунанд.
Феълан аз рӯи ин ҳодиса Кумитаи тафтишотии Русия парванда оғоз карда, тафтишот идома доранд.