ДУШАНБЕ, 15 окт — Sputnik. Эмомалӣ Раҳмон роҳбари давлат субҳи 15 октябр тоҷикистониёнро бо фарорасии ҷашни Меҳргон — яке аз куҳантарин ойинҳои мардуми куҳанбунёди тоҷик, самимона табрик намуд.
Дар матни табрикотие, ки котиботи президент нашр намуд, Эмомалӣ Раҳмон гуфтааст, ки Меҳргон ҷашнест, ки бар асоси қонунҳои табиат, баробаршавии шабу рӯз дар фасли тирамоҳ ва ҷамъоварии ҳосилоти кишоварзиву боғдорӣ ташаккул ёфтааст.
Ба таъкиди роҳбари давлат, танҳо ба шарофати истиқлоли давлатӣ ҷашни Меҳргон бо тамоми расму одатҳои неки он аз нав зинда гардонда шуд.
Дар идома, Эмомалӣ Раҳмон аз вазъи ноороми сайёра, тағйирёбии иқлим ва оқибатҳои ногувори он, таҳримҳои иқтисодиву молиявӣ, болоравии босуръату бесобиқаи нархи маҳсулоти кишоварзӣ ва маводи ғизоӣ қайд намуд.
Ӯ гуфт, дар шароити вазнин мардуми тоҷик бояд беш аз ҳар вақти дигар кор кунад, заҳмат кашад то ҳарчи бештар маҳсулоти озуқаворӣ истеҳсол ва захира намояд.
"Истифодаи самараноки обу замин, технологияҳои инноватсионӣ, баланд бардоштани ҳосилнокии зироатҳо, васеъ ба роҳ мондани кишти такрорӣ вазифаи муҳимтарину аввалиндараҷаи мо дар вазъияти кунунӣ мебошад", - тавзеҳ дод президент.
Ба таъкиди Раҳмон, корро дар ин самт тавре ба роҳ бояд монд, ки мардум дар фасли зимистон ба камбудиву танқисӣ рӯ ба рӯ нашаванд ва муҳтоҷӣ накашанд.
Президент изҳори боварӣ кард, ки кишоварзони мамлакат ва кулли мардуми кишвар бо заҳмати дастҷамъонаи худ ба хотири ҳифзи амнияти озуқаворӣ ва таъмини фаровонии бозори истеъмолӣ беш аз пеш саъю талош мекунанд.