ДУШАНБЕ, 11 окт — Sputnik. Раиси шаҳри Душанбе Рустами Эмомалӣ бо Раиси шаҳри Минск Владимир Кухаров мулоқот намуд, иттилоъ додааст дафтарии матбуоти шаҳрдорӣ.
Тибқи иттилои манбаъ дар мулоқот ҳолати кунунӣ ва дурнамои муносибатҳои ҳамкорӣ миёни мақомоти иҷроияи ҳокимияти давлатии шаҳри Душанбе ва Беларус баррасӣ гардид.
“Раиси шаҳри Душанбе аз вазъи муносибатҳои мутақобилан судманд миёни Тоҷикистон ва Беларус бо таваҷҷуҳ ба робитаҳои қавии сиёсӣ, иқтисодӣ, илмиву техникӣ изҳори қаноатмандӣ кард”,- хабар додааст шаҳрдорӣ.
Ҳамзамон ҷонибҳо ба рушди ҳамкории иқтисодиву тиҷоратӣ ва иҷтимоиву фарҳангӣ аҳамияти аввалиндараҷа дода, таъкид намуданд, ки шаҳрҳои Минск ва Душанбе дорои имконият ва захираҳои фаровони ҳамкории гуногунҷанба мебошанд.
Дар ин мулоқот таъкид шудааст, ки ҳоло миёни соҳибкорон ва корхонаҳои тиҷоратии шаҳрҳои Душанбе ва Минск ҳамкории мутақобилан судманд дар ташкили корхонаҳо ва омода намудани мутахассисони соҳавӣ ба роҳ монда шудааст.
Зикр гардидааст, ки иштирокчиёни мулоқот омодагии худро барои боз ҳам бештар рушду густариш додани ҳамкорӣ миёни соҳибкорони ҳарду ҷониб ва миёни мақомоти шаҳри Душанбе ва Кумитаи иҷроияишаҳри Минск дар соҳаҳои тандурустӣ, маориф ва фарҳанг иброз намуданд.