ДУШАНБЕ, 6 окт — Sputnik. Мавқеи рубл аз ҳисоби сармоягузорӣ дар минтақаҳои нав мустаҳкам мешавад. Дар ин бора номзади илмҳои иқтисодӣ Михаил Беляев изҳор дошт.
Ба гуфтаи ӯ, пайдоиши лоиҳаҳои сармоягузории марбут ба фаъолияти иқтисодӣ дар минтақаҳои нави Федератсияи Русия, инчунин афзоиши шумораи ҷойҳои корӣ ба иқтисоди Русия таъсири мусбат мерасонад.
Коршинос таъкид кард, ки харҷи зиёди барқарорсозии ҷумҳуриҳои мардумии Донетск ва Луганск, вилоятҳои Запороже ва Херсон дар оянда ба фоида табдил хоҳад ёфт.
"Ин метавонад як хароҷоти мустақими буҷаи Русия барои сохтмони хонаҳо ва корхонаҳо ба назар расад, аммо дар асл ин сармоягузорӣ хоҳад буд", - шарҳ дод Беляев.
Вай қайд кард, ки "мо аз иқтисодиёти миллӣ пул намекашем, балки маблағгузорӣ мекунем".
Афзоиши қаламрави кишвар минтақаи рублро низ васеъ хоҳад кард, гуфт мусоҳиби радиои Sputnik.
"Агар иқтисод пас аз пайдо шудани субъектҳои нав тавассути лоиҳаҳои нави сармоягузорӣ устувортар шавад, пас пули миллӣ низ қавитар мешавад", - хулоса кард коршинос.
Қаблан раисиҷумҳури Русия Владимир Путин қонун дар бораи пайвастани ҷумҳуриҳои мардумии Донетск ва Луганск, вилоятҳои Запороже ва Херсон ба Федератсияи Русияро имзо кард.
Тибқи санадҳо, дар минтақаҳои нави Русия асъор рубл хоҳад буд, аммо то 31 декабри соли 2022 барои ҳисоббаробаркуниҳо, гривнаи украинӣ низ иҷоза дода мешавад.