ДУШАНБЕ, 4 окт — Sputnik. Шӯрои Федератсия созишномаҳои ба ҳайати Русия қабул кардани ҷумҳуриҳои мардумии Донетску Луганск, вилоятҳои Запорожею Херсонро ба тасвиб расонд.
Маврид ба зикр аст, ки президенти Русия, Владимир Путин ва раҳбарони минтақаи зикршуда созишномаҳоро 30 сентябр дар Кремл имзо карда, рӯзи 2 октябр Додгоҳи конститутсионӣ онҳоро ба Қонуни асосӣ мувофиқ донист. Думаи давлатӣ аллакай созишномаҳои мазкурро тасвиб кард.
Бар асоси асноди тасвибшуда, субъектҳои нав номашонро зимни пайвастшавӣ ба Русия ҳифз карда, созишномаҳо аз рӯзи имзояш мавриди амал қарор мегирад. Дар ҳамаи 4 субъекти нав то 1 январи соли 2026 марҳилаи гузариш ҷараён хоҳад дошт.
Воҳиди пулӣ рубл муқаррар шуда, то охири соли равон гардиши гривнаи украинӣ низ иҷозат дода мешавад.
Забони русӣ дар ин қаламравҳо давлатӣ эълон шуда, таъкид гардидаст, ки барои омӯзиши забонҳои дигари модарӣ тамоми шароит фароҳам мешавад.
Маврид ба зикр аст, ки президенти Русия, Владимир Путин зимни имзои ин созишномаҳо дар Кремл гуфт, барои ин иқдом миллионҳо нафар овози худро доданд ва ин ҳаққи онҳост, чун ҳаққи баробарию соҳибихтиёрии халқҳо дар Оинномаи СММ сабт гардидаст.
Раъйпурсӣ дар ҶХД, ҶХЛ ва минтақаҳои Херсону Запороже аз 23 то 27 сентябр баргузор шуда, сокинон ба ҷонибдорӣ аз пайвастшавӣ ба Русия овоз доданд.