ДУШАНБЕ, 3 окт — Sputnik. Раиси ҷумҳури Чеченистон, Рамазон Қодиров эълом кард, ки як воҳиди дигари ҷангиёнро ба Украина фиристодааст. Ба қарибӣ он бо сохтори нави ҷангӣ тақвият дода мешавад, изҳор дошт ӯ дар саҳифааш дар "Telegram".
"Ин барои он карда мешавад, ки хатти ҳамлаи мо то ҳадди имкон зич бошад, то ҷангиён якдигарро дар ҳуҷумҳо иваз намоянд", - навиштааст Қодиров.
Ҳамлаи артиши Русия ҳатто як дақиқа қатъ нахоҳад шуд, итминон дод ӯ. Вай афзуд, ки ҷанговарон дар сафи пеш буданро шараф мешуморанд.
Илова бар ин, раҳбари Чеченистон дар бораи вазъи кунунии ҷабҳа сухан гуфт. Ба гуфтаи ӯ, “шайтонҳо ба чанд маҳаллаи аҳолинишин ворид шуданд”. Аммо ин маънои онро надорад, ки онҳо пирӯз мешаванд, афзуд Қодиров.
"Мо ҳамаи ин шахру маҳаллаҳоро озод кардем ва боз онҳоро аз миллатгароҳо озод мекунем", - таъкид кард ӯ дар хотима.
Маврид ба зикр аст, ки қаблан Рамазон Қодиров гуфта буд, шумори ихтиёриёне, ки дар Донишгоҳи нерӯҳои вижаи Русия дар Чеченистон таълим гирифта, ба минтақаи амалиёти вижаи низомӣ фиристода шудаанд, аз 6 ҳазор нафар гузаштааст.
Вай изҳор дошт, ки "бародарии ҳарбӣ ҳадафи аввалиндараҷаи мо дар ҳама гуна корҳост" ва "Ахматовҳо худиҳоро намепартоянд".