ДУШАНБЕ, 27 сен — Sputnik. Намондани посгоҳҳо дар минтақаҳои баҳсии Тоҷикистону Қирғизистон ба вазъият дар марз мусбат таъсир хоҳад кард.
Ин нуктаро СААД бо нашри як паём ба истиқбол аз имзои санади марзӣ миёни Тоҷикистону Қирғизистон баён дошт.
"Санади мазкур барои роҳ надодан ба моҷаро, пешгирии даргириҳо, таъмини амнияту сулҳ дар минтақаҳои марзӣ қабул шудаст", - омадааст дар иттилоия.
Созмон таъкид намудаст, ки истифодаи зӯрӣ дар ҳалли масоили марзӣ номақбул буда, нофаҳмиҳо бояд қатъан бо роҳи дипломатӣ - сиёсӣ бартараф гарданд.
Саймуъмин Ятимов, раиси КДАМ Тоҷикистон дар пайи имзои санади қатъи низоъ дар марз бо ҳамтои қирғизаш, Қамчибек Тошиев, ин ҳуҷҷатро як навъ "ғайринизомисоз" унвон карда, афзуд, ки он чораҳои қатъиро фаро мегирад.
Ӯ гуфт, сулҳу оромӣ дар замини тоҷикону қирғизҳо замоне фаро мерасад, ки ҳамаи асноди имзошуда амалӣ гарданд.
Дар доираи ин санад 4 постгоҳӣ аз ҳарду ҷониб дар минтақаҳое, ки он ҷо асосан даргирӣ сурат мегирад, бардошта мешаванд.
Ду моҳ муҳлат дода шуд, ки дар минтақаҳои баҳсии наздимарзии Тоҷикистону Қирғизистон дурбинҳои назоратӣ насб карда шаванд.
Тоҷикистону Қирғизистон беш аз 980 километр марзи муштарак доранд, ки садҳо километри он ҳанӯз муайяну аломатгузорӣ нашудааст. Ин номуайянӣ мунтазам боиси низоъ ва хунрезӣ дар марз мегардад.
Даргирии ахири марзӣ миёни Тоҷикистону Қирғизистон 16 сентябр авҷ гирифт, ки садҳо куштаю маҷруҳро аз ҳарду ҷониб бар ҷой гузошт.