ДУШАНБЕ, 24 сен — Sputnik. Раиси шаҳри Душанбе Рустами Эмомалӣ қарорро бо мақсади дар сатҳи баланди ғоявӣ ва бадеӣ таҷлил намудани Рӯзи забони давлатиро имзо кард, иттилоъ додааст дастгоҳи Раиси шаҳри Душанбе.
Таъкид шудааст, ки барномаҳои мақомоти шаҳри Душанбе дар бораи омодагӣ ва таҷлили Рӯзи забони давлатии Тоҷикистон тасдиқ гардидааст.
Тибқи нақшаи барнома, дар пойтахт баргузор намудани як силсила барномаҳои фарҳангию фароғатӣ, маҳфилҳои адабӣ ва конференсияҳои илмӣ–амалӣ дар назар дошта шудааст.
Инчунин бо мақсади дар сатҳи баланд таҷлил намудани Рӯзи забони давлатӣ ва арҷ гузоштан ба он дар тамоми шаҳр навиштаҷоте, ки бузургиву шаҳомати забони тоҷикиро баён менамоянд, насб мегарданд.
Инчунин тамоми муассисаву ташкилоти зерсохтори Мақомоти иҷроияи ҳокимияти давлатии шаҳри Душанбе муваззаф гардидаанд, ки бахшида ба Рӯзи забони давлатӣ бо иштироки олимону адибон маҳфилҳои адабӣ баргузор намоянд.
Ёдовар мешавем, ки 5 октябри соли 2009 Қонуни Тоҷикистон “Дар бораи забони давлатии Тоҷикистон” ба тасвиб расид ва ин сана расман Рӯзи забони давлатӣ эълон гардида, ба феҳристи ҷашнҳои давлатӣ ва миллӣ ворид карда шуд.
Дар робита ба баланд бардоштани мақоми забони давлатӣ ва рушди он 28 ноябри соли 2020 Қарори Ҳукумати Тоҷикистон “Дар бораи Барномаи рушди забони давлатӣ барои солҳои 2020–2030” тасдиқ карда шуд, ки барои дурнамои рушди сиёсати забони давлатӣ дар ҷомеа заминаҳои ҳуқуқӣ, моддӣ ва иҷтимоиву иқтисодӣ фароҳам меоварад.
Барномаи мазкур маҷмӯи чорабиниҳоро барои рушди даҳсолаи забон муайян карда аст.