ДУШАНБЕ, 23 сен — Sputnik. Вазорати фарҳанги Тоҷикистон эълом кард аз 2 то 9 октябри соли равон дар шаҳрҳои Теҳрон, Шероз ва Табрези Эрон рӯзҳои фарҳангӣ баргузор мешавад.
Тибқи иттилои манбаъ, дар чорчуби рӯзҳои фарҳангии Тоҷикистон дар шаҳрҳои Теҳрон, Шероз ва Табрези Эрон консерт ва намоишгоҳҳо бо ҳузури ҳунармандони тоҷик баргузор хоҳад шуд.
Бояд гуфт, ки Тоҷикистону Эрон ду кишвари ҳамзабону ҳамфарҳанг буда, пайвандҳои таърихию меросии қадимиро доро мебошанд.
Равобити иқтисодӣ, иҷтимоӣ, фарҳангӣ ва маънавии Тоҷикистону Эрон дар солҳои ахир густариш ёфтааст.
Ёдовар мешавем, ки қаблан Муҳаммадтақии Собирӣ, сафири Эрон дар Тоҷикистон дар суҳбат бо расонаи эронӣ “khamenei.ir”, таъкид кард, ки дар солҳои авҷи равобит, сақфи таомулоту табодулоти молии Тоҷикистону Эрон дар ҳавзаи иқтисодӣ сесад миллион доллар буд, ки дар солҳои ахир ба камтар аз ҳафтяк коҳиш пайдо карда буд.
Вай гуфт, вале равобити иқтисодии ду кишвар дар тӯли муддати ҳашт моҳи ахир чаҳор баробар афзоиш пайдо кардааст.