ДУШАНБЕ, 21 сен — Sputnik. Дар шаҳри Ню-Йорк дар ҳошияи иҷлоси 77-уми Маҷмаи умумии СММ маросими имзои Баёнияи муштарак дар бораи барқарор намудани муносибатҳои дипломатӣ байни Тоҷикистон ва Ҷумҳурии Кооперативии Гайяна доир гардид, иттилоъ додааст "телеграм-канал"-и Вазорати корҳои хориҷӣ.
Таъкид шудааст, ки баёнияи муштаракро Вазири корҳои хориҷии Тоҷикистон Сироҷиддин Муҳриддин ва Вазири корҳои хоричӣ ва ҳамкории байналмилалии Ҷумҳурии Кооперативии Гайяна Хю Хилтон Тодд ба имзо расониданд.
Вазирони корҳои хориҷӣ инчунин аҳаммияти рушди муносибатҳои дуҷониба ва бисёрҷонибаи Тоҷикистон ва Гайянаро таъкид карданд.
Ёдовар мешавем, ки тибқи иттилои вазорати хориҷа, то якуми июли соли равон шумораи кишварҳое, ки бо Тоҷикистон муносибатҳои дипломатӣ барқарор намудаанд, ба 179 — то расидааст.
Вазорати хориҷа бар он аст, ки ҳамкориҳои дуҷониба ва бисёрҷонибаи Тоҷикистон бо кишварҳои хориҷӣ ва созмонҳои байналмилаливу минтақавӣ двр ҳоли густариш ёфтан қарор доранд.