ДУШАНБЕ, 16 сен – Sputnik. Бино ба иттилоъи сокинон тирпарронӣ дар ҳудуди ҷамоатҳои Зумрад ва Овчиқалъача шаҳру навоҳии Тоҷикистон ҳаммарз бо деҳоти Ботканд ва Лайлаки Қирғизистон хатм нашудааст.
Як масъули ҷамоати Зумрад ба Sputnik Тоҷикистон гуфт, ки ҷониби қирғизҳо сарфи назар аз музокироти мақомоти баландмақоми ду кишвар ба тирпарронӣ хотима набахшидаанд.
“Қирғизҳо ҳамоно тирпаррониро хатм накардаанд. Онҳо аз дидбонгоҳии марзи худ бо номи “Достук” сӯи маҳалли аҳолинишин тиркушоӣ доранд”, - иброз намуд, корманди ҷамоати Зумрад.
Дар ҳамин ҳол, манобеъ аз ҷамоати наздимарзии Овчи Қалъачаи ноҳияи Бобоҷон Ғафуров дар бораи тирпарронӣ дар марз бо ноҳияи Лайлаки Қирғизистон хабар медиҳанд.
Бино ба гуфтаи мақомоти маҳаллӣ тирпарронӣ умдатан аз ҳудуди деҳаи Мақсади қирғизҳо шунида мешавад.