ДУШАНБЕ, 10 сен — Sputnik. Гардиши коло миёни Тоҷикистону Русия дар нимаи аввали соли 2022 нисбат ба ҳамин давраи соли 2021 20% афзоиш ёфтааст.
Дар ин бора раҳбари Вазорати саноат ва савдои Федератсияи Русия Денис Мантуров дар паёми баъди мулоқоти бо вазири саноат ва технологияи нави Тоҷикистон Шералӣ Кабир ва раиси Кумитаи давлатии сармоягузории ҷумҳурӣ Саъдӣ Қодирзода изҳор дошт.
"Денис Мантуров мақоми махсуси шарикии муносибатҳои иқтисодии дуҷонибаро қайд кард, ки аз ҷумла динамикаи мусбати тиҷорати мутақобилаи Русия ва Тоҷикистон тасдиқ мешавад", - омадааст дар хабарнома.
Илова бар ин, дар ҷараёни мулоқот ҷонибҳо масъалаҳои дурнамои ҳамкориҳои дуҷониба дар соҳаҳои калидӣ, аз ҷумла металлургия, таҷҳизоти истихроҷи маъдан, саноати сабук ва масолеҳи сохтмонро баррасӣ карданд.
Ҳамчунин Душанбе ва Маскав ба мувофиқа расиданд, ки ҳамкориҳоро дар заминаи паркҳои саноатӣ ва минтақаҳои озоди иқтисодӣ фаъол созанд.
Таваҷҷуҳи хоса ба омодагии Анҷумани сармоягузории дарпешистодаи "Русия - Тоҷикистон", ки қарор аст 15 сентябр дар Душанбе баргузор шавад, дар он беш аз 100 корхона ва созмони Русия ширкат хоҳанд кард.