ДУШАНБЕ, 8 сен — Sputnik. Дар робита ба таҷлили 31-умин солгарди Рӯзи истиқлол дар Тоҷикистон ба унвони раисҷумҳур Эмомалӣ Раҳмон номаву барқияҳои табрикӣ ирсол мешаванд.
Ҳамин тавр, паёмҳои идона аз ҷониби раҳбарони Русия Владимир Путин, Ӯзбекистон – Шавкат Мирзиёев, Қазоқистон – Қосимҷомарт Тоқаев, Қирғизистон – Содир Ҷабборов, Туркманистон – Сардор Бердимуҳамедов, Беларус – Александр Лукашенко, дабири кулли СПАД Станислав Зас ирсол шуданд.
Ҳамзамон ҷашни истиқлоли Тоҷикистонро як қатор раҳбарони ҷаҳони арабу аврупоӣ ва сарони ташкилотҳои байналмилалӣ табрик кардаанд.
Дар табрикот аз дастовардҳои Душанбе дар солҳои истиқлолият, аз ҷумла рушди иҷтимоию иқтисодӣ ва баланд бардоштани сатҳи зиндагии шаҳрвандон ва афзоиши нақши кишвар дар арсаи ҷаҳонӣ баҳои баланд дода шудааст.
Қаблан Эмомалӣ Раҳмон, раисиҷумҳури Тоҷикистон ба мардуми Тоҷикистон паёми идона ирсол карда, дар он ҳамчунин аз дастовардҳои кишвар дар тӯли солҳои гузашта ёдовар шуда, ҳамватанонро табрик гуфта, барояшон рӯзгори обод ва фаровонӣ таманно кард.
Ӯ дар робита ба вазъи кунунии иқтисодиву сиёсӣ сокинони кишварро ба иттиҳоду ҳамбастагӣ барои ободии бештари кишвар даъват кард.