ДУШАНБЕ, 21 авг — Sputnik. Гулаҳмадзода Зулфиқор Аҳмад, бо гирифтани 75%-и оро дар интихоботи миёнадаврии парлумонӣ вакили нави Маҷлиси намояндагони Тоҷикистон аз ҳавзаи Данғара интихоб шудааст.
Ба иттилои КМИР, дар пайи орошумории ниҳоӣ муайян шудааст, ки ба тарафдории Гулаҳмадзода наздики 79 ҳазор нафар овоз додаанд.
КМИР аз натиҷаи интихоботи миёнадаврӣ, ки ҳафтаи гузашта баргузор шуд, қарор намудааст, ки ваколатҳои вакили нав тасдиқ ва шаҳодатномаи вакилӣ супорида шавад.
Маврид ба зикр аст, ки қаблан Гураҳмадзода дар Ҳизби халқӣ - демократии Тоҷикистон фаъолият карда, роҳбарии кумитаи иҷроияи ин ҳизб дар ноҳияи Шоҳмансурро ба уҳда дошт.
Вай дар курсии вакили парлумон аз аз ҳавзаи Данғара, Лутфия Абдухолиқзодаро иваз мекунад. Абдухолиқзода дар пайи тағйироти кадрӣ, ки Эмомалӣ Раҳмон, раисҷумҳури Тоҷикистон моҳи феврали соли равон дар раёсати Вазорати маориф ва илми ҷумҳурӣ амалӣ кард, ба мақоми муовини вазир таъйин шуда буд.
Интизор меравад, фаъолияти вакилии Гулаҳмадзода аз Иҷлосияи якуми ғайринавбатии Маҷлиси намояндагони Тоҷикистон, ки 24 августи соли 2022 дар шаҳри Душанбе даъват гардидаст, оғоз шавад.
Маҷлиси намояндагон, палатаи поёнии парлумони Тоҷикистон ба шумор рафта, аз 63 вакил иборат мебошад, ки дар 5 сол як бор аз тариқи интихоботи умумӣ бо овоздиҳии пинҳонӣ интихоб карда мешаванд. Маҷлиси намояндагон дар Тоҷикистон доимамалкунанда ва касбӣ мебошад.