ДУШАНБЕ, 18 авг – Sputnik. Раҳимов Саидаҳмад Раҳимович фарзанди паҳлавони шинохта Саймумин Раҳимов боздошт шудааст.
Ӯ 22 сол дошта, аз ҷониби кормандони Вазорати корҳои дохила бо иттиҳоми куштор дастгир шудааст.
Тибқи иттилои гузориши ин ниҳод, Раҳимов дар куштори сокини деҳаи Чорбоғи ноҳияи Варзоб Маҳаммадҷовид Зокирзода, ки шинос буд, гумонбар дониста мешавад.
Ба иттилои манбаъ, ҳодиса санаи 5 август сар зада, мақомот сабаби онро нофаҳмиҳо дар пайи додугирифти молиявӣ унвон кардаанд.
Гуфта мешавад, ки Раҳимов Зокирзода пас аз нофаҳмии ночизе ба наздаш хонда бо 17 зарби корд аз ҳаёт маҳрум сохтааст.
“Вақте гарданамро дошт, талош кардам, ки халос кунам, сар надод. Баъдан чанд зарба дар шикам ва пойҳояш (бо корд-ред) то сар доданаш задам. Сар, ки дод, даруни об ғалтидам ва ҳангоми баромадан дидам, ки ӯ нишасту хун меравад, аз роҳи дигар рафтам”, - гуфт, Раҳимов зимни бозпурсӣ ба кормандони пулис.
ВУД мегӯяд боздоштшуда дар ҳабси пешакӣ қарор дошта, вобаста ба ҳолати мазкур алайҳи боздоштшуда, алайҳаш бо моддаи 104, қ. 2-и Кодекси ҷиноятии Тоҷикистон парвандаи ҷиноятӣ боз шудааст.
Дар сурати тасдиқи айбдорӣ аз ҷониби додгоҳ, Раҳимовро бар асоси моддаҳои болозикр аз 10 то 15 соли маҳрумият аз озодӣ ё ҳабси якумра интизор аст.