ДУШАНБЕ, 14 авг — Sputnik. Дар конфронси вазирони нақлиёти кишварҳои маҳсур дар хушкӣ, ки дар Туркманистон баргузор мешавад намояндагони 32 кишваре, ки роҳи баромад ба баҳр надоранд, бо иттифоқи ҳудуди 30 созмони хориҷиву байнулмилалӣ ширкат мекунанд.
Дафатари матбуоти вазорати нақлиёти Тоҷикистон ба Sputnik Тоҷикистон гуфт, ин конфронс 15 ба 16 августи соли равон дар мавзеи Авазаи шаҳри Туркменбошии Туркманистон баргузор мешавад.
“Қарор аст вазири нақлиёти Тоҷикистон раёсати сессияи чоруми конфронс таҳти унвони “Тезонидани рақамикунонӣ барои беҳтарсозӣ ва транзит ва соддагардонии раванди тиҷорат, ҳамзамон барқаррорсозии устувор пас аз давраи пандемияи COVID-19” ба дӯш дошта бошад”, - гуфт манбаъ.
Ҳайати Тоҷикистон таҳти раёсати Азим Иброҳим, вазири нақлиёт дар ин конфронс ҳамчунин шомили сардори муассисаи давлатии “Нақлиёти автомобилӣ ва хизматрасонии логистикӣ” Раҳмиддин Саломзода ва намояндагони сафорати Тоҷикистон дар Туркманистон аст.
Конфронси мазкур масоили рушди долонҳои нақлиётии минтақавӣ, ҳамгироии системаи инфрасохтори ҳамлу нақли мултимодалӣ, рақамикунонии раванди ҳамлу нақл, рушди нақлиёти барқӣ ва дигар масъалаҳои муҳим мавриди баррасӣ ва муҳокима қарор хоҳанд дод.
Тоҷикистон яке аз 32 кишвари маҳсур ба хушкӣ дар ҷаҳон аст, ки ҳеҷ роҳи баромад ба баҳрҳоро надорад. Аз ин хотир, ин кишвар талош мекунад, ки ба хотири рушди тиҷорат тариқи даҳлезҳои нақлиётӣ бо бандарҳо дар ҷанубу шимол васл шавад.
Қаблан вазорати нақлиёти Тоҷикистон эълон карда буд, ки дар пайи даст ёфтан ба ҳадафи стратегии бурунрафт аз бунбасти иртиботӣ як ҳадафи дигарро ба унвони табдил ёфтан ба як кишвари транзитӣ рӯи даст гирифтааст.