ДУШАНБЕ, 1 авг – Sputnik. Мақомоти Хадамоти иҷро дар бораи пешгирӣ аз кӯшиши ғайбзании як гурӯҳ қарздорон дар Суғд иттилоъ доданд.
Амонзода Алиҷон Собир, сардори Раёсати Хадамоти иҷро дар вилояти Суғд, дар нишасти хабарӣ гуфт, 48 нафаре, ки аз шумори сокинон, ки бо қарори додгоҳ қарздор эътироф шудаанд, қасди убури сарҳадро доштанд, вале ин амалкарди ғайриқонунии онҳо пешгирӣ карда шудааст.
“Ин афрод бо роҳи фиреб ба берун аз кишвар рафтан мехостанд, вале ҳар кадоми онҳо дар сарҳади Ҷумҳурии Тоҷикистон боздошт гардида, аз онҳо дар умум 435, 2 ҳазор сомонӣ маблағҳои бо санадҳои судӣ ва мақомот таъйингардида ба буҷҷаи давлат ва шахсони воқеӣ ва ҳуқуқӣ руёнида шудааст” – афзуд сардори Раёсати Хадамоти иҷро.
Бино ба иттилоъи ӯ, давоми шаш моҳи соли ҷорӣ нисбати 561 нафар қарздорон қарор дар бораи муваққатан маҳдуд намудани сафари онҳо ба берун аз ҳудуди кишвар қабул гардидааст.
Мақомот мегуянд, дар ин давра ба назорати иҷрочиёни Хадамоти иҷро дар Суғд ва иҷрочиён дар суди ҳарбии гарнизони Хуҷанд ҳамагӣ 8217 адад ба маблағи беш аз 95 миллион сомонӣ мавод ва арзу муроҷиати шахсони воқеӣ ва ҳуқуқӣ вобаста ба таъмини санадҳои судӣ ва санади мақомотҳо ворид гардида, аз ин теъдод 6502 адад ва ё 79 дарсад и санадҳо ба таври воқеӣ ба иҷро расонида шуда аз ин ҳисоб беш аз 8 миллион сомонӣ маблағ руёнида шудааст.