ДУШАНБЕ, 26 июл — Sputnik. Паҳншавии зархаридон ва аслиҳа аз Украина барои кишварҳои ИДМ, аз ҷумла Тоҷикистон хатари ниҳоят ҷиддӣ дорад. Дар ин бора додситони кулли Русия Игор Краснов хабар дод.
Дар дидор бо Юсуф Раҳмон, ҳамтои тоҷикаш дар Душанбе, вай таъкид кард, ки хатар барои кишварҳои ИДМ дар робита ба авзоъ дар Украина афзоиш ёфтааст.
"Имрӯз кишварҳои мо бо таҳдидҳои нав ва ниҳоят хатарнок рӯбарӯ ҳастанд. Дар миёни онҳо иштироки шаҳрвандони кишварҳои ИДМ дар амалиёти ҷангӣ ба ҳайси зархарид, паҳншавии силоҳ, муҳимот ва маводи мухаддир аст", - гуфт Краснов.
Ба гуфтаи ӯ, барои рафъи чолишҳои нав, кишварҳои ИДМ ва ниҳодҳои интизомӣ бояд барномаҳои ҳамкориро барои баланд бардоштани самаранокии кор дар ин самт "навсозӣ" кунанд.
Дар ҷараёни музокирот Игор Краснов ва Юсуф Раҳмон барномаи ҳамкории ниҳодҳои назоратӣ то соли 2024-ро имзо карданд.
"Имрӯз кишварҳои мо бо таҳдидҳои нав ва ниҳоят хатарнок рӯбарӯ ҳастанд. Ин баланд бардоштани самаранокии амалҳои моро тақозо мекунад, зеро мо танҳо якҷоя метавонем ба муқобили ҷинояткорӣ мубориза барем. Анъанаи неки ҳамкориҳоямонро идома дода, имрӯз мо бо шумо як барномаи навбатии ҳамкориҳоро ба имзо мерасонем. , — гуфт Краснов ҳангоми имзои санад.
Ба гуфтаи додситони кул, табодули таҷриба аллакай маҳсули худро хуб собит кардааст. Ҳамин тавр, кормандони ҳарду ниҳод оид ба назорати прокурорӣ ва таҳқиқоти илмӣ табодули афкору машваратҳо карданд.
Як рӯз пеш Эмомалӣ Раҳмон, раисиҷумҳури Тоҷикистон низ бо Краснов мулоқот кард.
Онҳо доираи васеи масоили марбут ба таъмини амният ва ҳамкориҳои ҳуқуқии Маскаву Душанберо баррасӣ карданд.
Ҳайати Русия рӯзи 25 июл барои ширкат дар ҳайати мушовараи Додситонии кулл вориди Тоҷикистон шуда буд.