ДУШАНБЕ, 18 июл — Sputnik. Тоҷикистон азм дорад, бо ҷалби сармоягузорони чинӣ корхонаҳои равғани замони шӯравиро дубора фаъол созад.
Шералӣ Кабир, вазири саноат ва технологияҳои нави Тоҷикистон, гуфт, феълан таъминоти бозор бо равғани худӣ ба мушкили аслӣ табдил ёфтааст.
Ӯ зикр намуд, ки дар айни ҳол иқтидорҳои тавлиди равған дар Тоҷикистон ҳамагӣ 20%-и талаботи бозорро таъмин мекунанд.
Вазир гуфт, барои ислоҳи вазъ дар Ӯзбекистон бо масъулини ширкати чиние мулоқот дошт, ки ба тавлиди таҷҳизот барои истеҳсоли равған машғуланду дар кишвари ҳамсоя чандин корхонаро фаъол кардааст.
Вай илова намуд, ки барои фаъолсозии иқтидорҳои нав дар Тоҷикистон, аз ҷумла корхонаҳои равғанбарории замони шӯравӣ дар Бохтар, Душанбе, Конибодом ва Хуҷанд мутахассисони ширкати чиниро даъват кардааст.
Шералӣ Кабир изҳори умед намуд, ки бо ҷалби ин ва дигар шарикон иқтидорҳои нави равғанбарорӣ дар Тоҷикистон фаъол хоҳанд шуд.
Ин дар ҳолест, ки равған ба Тоҷикистон аз ҷумла аз Русия ворид карда мешавад ва Маскав квотаҳои содироти равғани офтобпараст ба андозаи 400 ҳазор тоннаро зиёд кард.
Қаблан ҳаҷми иҷозатдодашуда барои содироти равған аз Русия 1,5 млн тоннаро ташкил медод. Таъкид шудааст, ки квотаҳо барои содироти равғани офтобпараст то 31 август амал мекунанд.