ДУШАНБЕ, 12 июл — Sputnik. Ширкати электроэнергетикии "Da Afghanistan Breshna Sherkat" (DABS) тамоми қарзҳои нерӯи барқи Тоҷикистонро пардохт накардааст.
Дар ин бора Маҳмадумар Асозода, раиси холдинги "Барқи тоҷик" зимни нишасти матбуотӣ изҳор дошт.
"Ширкати энержии Афғонистон маблағи як миқдор нерӯи барқро пардохт мекунад. Интизор меравад, ки қарзҳо бо афзоиши қобилиятҳои пардохтӣ марҳила ба марҳила пӯшонида шаванд", - гуфт ӯ.
Дар ҳамин ҳол, ӯ аз маблағи мушаххасе, ки ҷониби Афғонистон аз Тоҷикистон қарздор аст, ном набурд. Маълум аст, ки қарзҳо давра ба давра дода мешаванд.
Ӯ таъкид намуд, ки айни замон шабонарӯзӣ аз Тоҷикистон ба Афғонистон то 9 млн кВт/соат нерӯи барқ интиқол дода мешавад.
Мутобиқи қарордод Афғонистон барои ҳар кВт/соат Афғонистон 4,67 сент пардохт мекунад.
Дар нимаи аввали соли 2022 Душанбе ба Кобул ба маблағи беш аз 30 миллион доллар нерӯи барқ интиқол додааст.
Ба гуфтаи Асозода, интиқоли захираҳо тибқи созишномаи қаблӣ барои соли 2022 сурат мегирад. То охири сол Тоҷикистон қасд дорад, бо ширкати афғонистонии "Брешна" санади нави интиқоли барқ барои соли 2023 имзо кунад.
Раиси ширкати "Барқи тоҷик" ҳамчунин гуфт, дар нимсолаи аввали соли 2022 Тоҷикистон беш аз 10 миллиард кВт/соат нерӯи барқ содир кардааст.
Ёдовар мешавем, ки дар оғози соли 2022 қарзи Афғонистон аз Тоҷикистон барои нерӯи барқ 33 миллион доллар буд.