ДУШАНБЕ, 11 июл — Sputnik. Нерӯҳои Русия бо зарбаи мушакҳои "Калибр" лавозимоти ҷангӣ барои тӯпхонаи реактивии HIMARS ва гаубитсҳои М777-ро нобуд кардааст
Анбори лавозимоти ҷангӣ барои тӯпхонаи амрикоии HIMARS ва гаубитси М77 дар минтақаи аҳолинишини Рашдушноеи вилояти Днепропетровск нобуд карда шуд, хабар дод Вазорати мудофиаи Русия.
Ба иттилои манбаъ, лавозимоти ҷангии нобудшуда аз ҷониби ИМА ба Украина интиқол дода шудаанд.
Ҳамчунин таъкид шуд, ки халабонҳои низомии Русия нуқтаи фармондеҳии бригадаи 58-уми хушкигарди савораро дар наздикии Артёмовск , анбори аслиҳа ва нерӯи зиндаи ҷониби украиниро ҳадафи зарба қарор додаанд.
"Дар пайи зарба ба мақари миллатгароҳо ва зархаридҳои хориҷӣ дар ноҳияҳои Основянск ва Слободи Харков 250 ҷангӣ ва 25 адад техникаи зиреҳпӯшу автомобилҳо нобуд карда шуданд", - омадааст дар иттилоия.
Ин дар ҳолест, ки ахиран мақомоти мудофиаи Русия хабар доданд, ки ду дастгоҳи партоби мушакии навъи HIMARS-и амрикоӣ дар Донетск нобуд карда шуданд. Ба иттилои манбаъ, дар маҳалли истиқоматии Малотарановкаи ҷумҳурии Донетск, мушакҳои дақиқияташон баланди Русия ду дастгоҳи партоби мушакии амрикоиро ҳадаф қарор доданд.
Маврид ба зикр аст, ки пештар Иёлоти Муттаҳидаи Амрико аз интиқоли системаҳои мушакии чандкаратаи HIMARS ба Украина эълон карда буд, ба шарте ки онҳо барои зарба задан ба қаламрави Федератсияи Русия истифода нашаванд.
Владимир Зеленский, раисҷумҳури Украина ошкоро тасдиқ кард, ки Киев ин талаботро риоя хоҳад кард, аммо бархе мақомдорони дигар эҳтимоли аҳдшикании Киевро низ аз воқеият дур намедонанд.
Вазорати умури хориҷии Русия низ таъкид намуд, ки интиқоли силоҳ ба Украина танҳо даргириҳои низомиро тӯл медиҳад, аммо ба бароварда шудани ҳадафҳои гузошташудаи амалиёт таъсире нахоҳад дошт.